Претседателот на Република Македонија д-р Ѓорге Иванов

НЕ ПРИФАЌАМ ДОГОВОР ШТО Е ШТЕТЕН ЗА МАКЕДОНСКИТЕ НАЦИОНАЛНИ ИНТЕРЕСИ

(Преземено од МИА)


– Претседателот Ѓорге Иванов на денешната средба со вршителот на должноста заменик-помошник државен секретар во Стејт Департментот на САД за Европа и Евроазија, Метју Палмер во однос на постигнатиот договор меѓу владите на Република Македонија и Република Грција, истакнал дека не прифаќа договор со кој се крши Уставот, законите и се рушат државните институциите и претставува договор што е на штета на македонските национални интереси.
На средбата, како што соопшти кабинетот на Иванов, било разговарано за актуелните политички состојби во Република Македонија и за натамошно зацврстување, збогатување и унапредување на стратегиското партнерство меѓу Република Македонија и САД.
Македонскиот претседател изразил очекување дека ќе продолжи американската поддршка за надворешно политичките цели и приоритети на Република Македонија, за добрососедските односи и регионалната соработка.
Претседателот Иванов посочил дека Република Македонија уште во 2008-та година ги исполни условите за членство во НАТО и сиве овие години активно придонесувајќи во НАТО мисиите, заедно со земјите-членки, Република Македонија го заслужува членството без дополнителни услови.
На средбата, претседателот Иванов потенцирал дека одржување на мирот, стабилноста и просперитетот на нашиот регион е од клучно значење за целиот европски континент.